‘மாவீரன்’ – விமர்சனம்

மண்டேலா படத்தின் மூலம் அனைவரின் கவனத்தையும் ஈர்த்த இயக்குனர் மடோன் அஸ்வின் இயக்கத்தில் நடிகர் சிவகார்த்திகேயன், நடிகை அதிதி ஷங்கர் நடித்துள்ள படம் ‘மாவீரன்’ . இந்தப் படத்தில் நடிகை சரிதா, இயக்குநர் மிஷ்கின், யோகிபாபு ஆகியோர் முக்கிய கேரக்டர்களில் நடித்துள்ளனர். பரத் ஷங்கர் இப்படத்துக்கு இசையமைத்துள்ளார். இன்று பெரும் எதிர்பார்ப்புகளுக்கிடையே வெளியாகியுள்ள ‘மாவீரன்’ படத்தின் விமர்சனத்தை இங்கு காணலாம்.

சென்னையில் காலம் காலமாக வசிக்கும் குடிசை வாழ் மக்கள் வளர்ச்சிக்காக நகரில் இருந்து அப்புறப்படுத்தப்பட்டு “மக்கள் மாளிகை” அடுக்குமாடி குடியிருப்புக்கு மாற்றப்படுகிறார்கள். ஊழலின் ஊற்றாக, அடுத்த நொடி உயிருக்கே உத்தரவாதம் இல்லாமல் கட்டப்பட்டிருக்கும் அந்தக் குடியிருப்பில் தினம் தினம் பிரச்சினைகள். இந்த பிரச்சினைகளுக்கு எல்லாம் போகாமல் எதையும் அட்ஜஸ்ட் பண்ணி வாழும் தைரியம் இல்லாத ஹீரோவான  சிவகார்த்திகேயன், ஒரு கட்டத்தில் அந்தத் துறை அமைச்சராக வரும் மிஷ்கினுடன் தைரியமாக மோதுகிறார்.
மக்கள் அவரை மாவீரனாக பார்க்கிறார்கள். எங்கிருந்து சிவகார்த்திகேயன் இவ்வளவு தைரியம் வந்தது? மாவீரனாக அவர் மக்களை காத்தாரா? இல்லை மக்களுக்கான உரிமைப் போரில் தோற்றாரா? என்பதே இப்படத்தின் கதையாகும்.

பிரின்ஸ் பட தோல்விக்குப் பின்  நம்ம வீட்டுப்பிள்ளையாக கலகலப்பாகவும், ஆக்ஷன் ஹீரோவாகவும் சிவகார்த்திகேயன் நம்மை கவர்கிறார்.தின தீ பத்திரிக்கையில் கார்ட்டூன் ஓவியராக  வரும் சிவகார்த்திகேயனின் அப்பாவியான நடிப்பு அனைவரையும் கவரும்.

 அவருக்கு அடுத்து ‘எடுப்பார் கைப்பிள்ளை’யாக இருக்கும் அமைச்சர் மிஷ்கினின் கேரக்டர் ரசிக்க வைக்கிறது.

ஒரு சில காட்சிகளில் இயக்குனர் மிஷ்கின் தனது கண்களாலேயே படம் பார்ப்பவரை மிரட்டுவது நிச்சயம்.

வரும் அத்தனை காட்சிகளிலுமே கைதட்டல் தான்.யோகிபாபுவின் காமெடி காட்சிகள் நன்றாகவே ஒர்க் அவுட் செய்திருக்கிறது.

அடுத்தபடி சரிதா அந்த குடிசை வாழ் பெண் போலவே காட்சியளிக்கிறார் நீண்ட நாட்களுக்குப் பிறகு சரிதாவை திரையில் பார்த்த மகிழ்ச்சி.

அதிதி ஷங்கர் இரண்டாவது படத்தில் தெளிவான நடிப்பை வெளிப்படுத்தி இருக்கிறார் இவருக்கு தமிழ்  சினிமா உலகில் நல்ல எதிர்காலம் உண்டு.

சிவகார்த்திகேயன் தங்கையாக வரும் பெண்ணும் மிக அற்புதமாக நடித்திருக்கிறார்.
மண்டேலா படம் மூலம் ஒரு குடிமகனின் வாக்கு முக்கியத்துவம் குறித்து பேசி கவனம் ஈர்த்த மடோன் அஸ்வின், இதில் குடிசைவாழ் மக்களின் பிரச்சினையை பற்றி பேசியுள்ளார்.

அந்த அழுத்தத்தை கொஞ்சம் நகைச்சுவையாகவும், கொஞ்சம் சீரியஸ் ஆகவும் பேசி இருக்கிறார் என்றே சொல்லலாம்.

இதிலும் வாக்களித்த மக்கள் அனைவரும் இலவசமாக பெரும் வீட்டை வாங்குவது குறித்து யோசிக்க வைத்திருக்கிறார் மடோன் அஸ்வின்.

முதல் பாதி முழுக்க கலகலப்பான காட்சிகளுடன் பயணிக்கும் கதை, இரண்டாம் பாதியில் சற்று விறுவிறுப்பு குறைவு என்றாலும் சிவகார்த்திகேயன் மாவீரனாக மாறும் ஒவ்வொரு காட்சியும் மிக அற்புதமாக இருக்கின்றது.

படத்தில் பின்னனியில் ஒலிக்கும் விஜய் சேதுபதியின் குரல் படத்தை இன்னும் சுவாரசியம் ஆக்குகிறது.

பாடல்களில் புதிய ரகம் தெரிகின்றது.பரத் சங்கரின் பின்னணி இசை பல இடங்களில் ரசிக்க வைக்கிறது.

சிவகார்த்திகேயனின் அப்பாவியான  நடிப்பு நம்மை கவர்வது நிஜம்.

படம் பார்த்த பின்பு ஏற்கனவே தமிழ் சினிமாவில் வெளியான ரமணா,அந்நியன், போன்ற திரைப்படங்களின்  ஞாபகம் வந்தாலும்  இந்த மாவீரன் இதிலிருந்து சற்று மாறுபட்டு தெரிகிறான்.

பெண்களையும் குழந்தைகளையும் நிச்சயமாக இந்த படம் பெரிதும் கவரும்.

மொத்தத்தில் இந்த ‘மாவீரன்’, எல்லோருக்கும் பிடித்த மகா வீரனே…

                                         விமர்சகர்