சிங்காரம் – விமர்சனம்
நீண்ட நாட்களுக்கு பிறகு ஒரு வகையறாவை வாழ்வியலோடு சொல்லும் உணர்வுபூர்வமான காட்சிகள் நிறைந்து யோகி பாபு நடித்து வெளிவந்திருக்கும் படம் சிங்காரம்.
தமிழ் சினிமாவில் அவ்வப்போது சில திரைப்படங்கள் வெறும் பொழுதுபோக்கைத் தாண்டி, சமூகத்தின் கவனத்திற்குக் கொண்டு செல்லப்பட வேண்டிய முக்கியமான பிரச்சினைகளைப் பேசும். அந்த வரிசையில் குறிப்பிடத்தக்க படைப்பாக உருவாகியுள்ளது சிங்காரம்.
புதுச்சேரியில் நடைபெற்ற உண்மைச் சம்பவத்தை அடிப்படையாகக் கொண்டு, நரிக்குறவர் இன மக்களின் வாழ்வியல், அவர்களின் பூர்வீகம், சமூக அடையாளம் மற்றும் அடிப்படை உரிமைகளுக்கான போராட்டம் ஆகியவற்றை மையமாக வைத்து இப்படத்தை இயக்கியிருக்கிறார் இயக்குநர்.
நரிக்குறவர் இனத்தைச் சேர்ந்த மணி வியாபாரியான சிங்காரம், தனது சமூக மக்களுக்கு உரிய அடையாள ஆவணங்கள் மற்றும் அரசின் அடிப்படை நலத்திட்ட உதவிகள் கிடைக்காத சூழலில், அதற்காகப் போராடத் தொடங்குகிறார். ஒரு தனிமனிதனின் பிரச்சினையாகத் தொடங்கும் இந்தப் போராட்டம், ஒரு சமூகத்தின் உரிமைக்கான குரலாக மாறுவதுதான் படத்தின் மையக்கரு.
குறிப்பாக, நரிக்குறவர் இன மக்களின் பூர்வீகம் குறித்த தகவல்களையும் அவர்களின் சமூகப் பின்னணியையும் படத்தில் எடுத்துரைத்திருப்பது பாராட்டுக்குரிய அம்சம். இதுவரை அதிகம் பேசப்படாத ஒரு சமூகத்தின் வரலாற்றையும் வாழ்வியலையும் சினிமா வழியாகப் பதிவு செய்திருப்பது படத்திற்கு கூடுதல் பலம்.
இரண்டாம் பாதியில் படம் முற்றிலும் வேறொரு தளத்திற்குச் செல்கிறது. ஒரு சாதாரண மனிதன் நினைத்தால் தனது சமூகத்திற்காக எத்தகைய மாற்றத்தையும் உருவாக்க முடியும் என்பதை அழுத்தமாகச் சொல்லியிருக்கிறார் இயக்குநர். ஒரு நரிக்குறவர் சமூகத்தைச் சேர்ந்த மனிதர் எப்படி அரசியல் களத்தில் உயர்ந்து எம்.எல்.ஏ.வாக உருவெடுக்கிறார், அவருக்குப் பின்னால் இருக்கும் அரசியல் மற்றும் சமூகப் பின்னணி என்ன என்பதையும் உணர்வுப்பூர்வமாகப் பதிவு செய்திருக்கிறார்.
குறிப்பாக, இரண்டாம் பாதியில் தனிமனிதனின் போராட்டம் ஒரு இனத்தின் உரிமைப் போராட்டமாக மாறும் விதம் சிறப்பாக அமைந்துள்ளது. விறுவிறுப்பும், உணர்ச்சிப்பூர்வமான காட்சிகளும் இணைந்து பார்வையாளர்களை ஈர்க்கின்றன.
யோகி பாபு இப்படத்தில் தனது வழக்கமான நகைச்சுவை நடிப்பைத் தாண்டி, கதாபாத்திரத்திற்கு ஏற்ற யதார்த்தமான நடிப்பை வழங்கியிருக்கிறார். அவரது நடிப்பு படத்தின் முக்கியமான பலங்களில் ஒன்று.
எம்.எஸ். பாஸ்கர் தனது அனுபவமிக்க நடிப்பால் கதாபாத்திரத்திற்கு உயிரூட்டியிருக்கிறார். பல காட்சிகளில் அவரது நடிப்பு மனதில் அழுத்தமாகப் பதிகிறது. வேலா ராமமூர்த்தியின் கதாபாத்திரமும் படத்திற்கு முக்கியமான பலம் சேர்க்கிறது. நல்லசிவம் என்ற பெயரில் உருவாக்கப்பட்டுள்ள கதாபாத்திரம் சமூக மற்றும் அரசியல் பின்னணியில் கவனம் பெறுகிறது.
தீபா சங்கர், மாரிமுத்து, படவா கோபி உள்ளிட்டோரும் தங்களுக்குக் கொடுக்கப்பட்ட கதாபாத்திரங்களைச் சிறப்பாகக் கையாண்டுள்ளனர்.
சாம் சி.எஸ். இசை படத்தின் உணர்வுகளுக்கு ஏற்ற வகையில் அமைந்துள்ளது. பாடல்களும் பின்னணி இசையும் காட்சிகளின் தாக்கத்தை அதிகரிக்கின்றன. குறிப்பாக இரண்டாம் பாதியில் உணர்ச்சிப்பூர்வமான காட்சிகளுக்கு அவரது பின்னணி இசை கூடுதல் வலுசேர்க்கிறது.
ஒளிப்பதிவாளர் பிரசன்னா எஸ். குமார், கிராமப்புற இயற்கைச் சூழலையும் மக்களின் வாழ்வியலையும் அழகாகப் படம்பிடித்திருக்கிறார். காட்சிகளின் இயல்புத்தன்மை படத்தின் கதையோட்டத்திற்கு உறுதுணையாக இருக்கிறது.
ஒரு சமூகத்தின் அடையாளம், உரிமை, அரசின் நலத்திட்டங்களைப் பெறுவதில் உள்ள சிக்கல்கள் எனப் பல முக்கியமான விஷயங்களை வணிக சினிமாவின் கூறுகளுடன் இணைத்துச் சொல்லியிருப்பது இயக்குநரின் சிறப்பான முயற்சி.
முதல் பாதியில் சிரிக்க வைக்கும் திரைக்கதையை அமைத்த இயக்குநர், இரண்டாம் பாதியில் அதே கதையை உணர்வுப்பூர்வமான சமூகப் போராட்டமாக மாற்றியிருப்பது குறிப்பிடத்தக்கது. குறிப்பாக, ஒரு தனிமனிதனின் வெற்றி என்பது அவனது தனிப்பட்ட முன்னேற்றம் மட்டுமல்ல; அவன் சார்ந்த சமூகத்தின் முன்னேற்றத்திற்கும் வழிவகுக்க முடியும் என்ற கருத்தை அழுத்தமாகப் பதிவு செய்திருக்கிறார்.
மொத்தத்தில் வெறும் நகைச்சுவைக்காகவே இதுவரை பயன்படுத்தப்பட்ட யோகி பாபுவை நல்ல ஒரு கதையில் ஒரு நடிகராக நடிக்க வைத்த பெருமை இயக்குனரையே சேரும்.
