‘லால் சலாம்’ – விமர்சனம்
3 ,வை ராஜா வை இரண்டு படங்களை இயக்கிய பின் நீண்ட இடைவெளிக்கு பிறகு ரஜினிகாந்த் மகளும்,நடிகர் தனுஷின் மனைவியுமான ஐஸ்வர்யா ரஜினிகாந்த் இயக்கி இருக்கும் படம் லால் சலாம்.
இந்தப் படத்தில் ரஜினிகாந்த் ஒரு சிறப்பு தோற்றத்தில் நடித்திருக்கிறார் உலக கோப்பை நாயகன் கபில்தேவும் முதன்முறையாக இப்படத்தில் நடித்திருக்கிறார் இதுபோக விஷ்ணு விஷால் விக்ரம் தம்பி ராமையா நடிகர் செந்தில் போன்றவர்களும் நடித்திருக்கிறார்கள்.
1993ஆம் ஆண்டில் இருந்து தொடங்குகின்றது கதை. முரார்பாத் என்ற கிராமத்தில் ஒற்றுமையோடும் மதநல்லிணக்கத்தோடும் வாழ்ந்து வரும் இந்து – முஸ்லீம் மக்கள் மத்தியில் கிரிக்கெட் விளையாட்டினால் ஏற்படும் சின்ன மனஸ்தாபத்தை, அங்குள்ள அரசியல்வாதி தனக்கு சாதகமாக மாற்ற, இரு பிரிவினருக்கும் இடையில் மதக் கலவரத்தை தூண்டுகின்றார்.
தொடக்கம் முதல் க்ளைமேக்ஸ் வரை படம் வலியுறுத்தும் ஒரு மையக் கருத்து மதநல்லிணக்கம். மொய்தீன் பாயாக வரும் சூப்பர் ஸ்டார் தனது சிறப்பான நடிப்பினால் ரசிகர்களை கட்டிப் போடுகின்றார். மொய்தீன் பாய் கதாப்பாத்திரத்தை சிறப்பாகக் கையாண்டது மட்டும் இல்லாமல், தனது ரசிகர்களுக்கும் குட்டி ட்ரீட் கொடுத்துள்ளார் சூப்பர் ஸ்டார்.
படம் முழுக்கவே மதநல்லிணக்கத்திற்கு இடையூறாக உள்ள சில விஷயங்களை நேரடியாகவே காட்சிப்படுத்தி, இடையூறுகளைக் களைந்து எப்படி மதநல்லிணக்கத்தோடு இருப்பது என அழமாக சொல்லியுள்ளார் இயக்குநர் ஐஸ்வர்யா ரஜினிகாந்த்.
லால் சலாம் திரைப்படத்தின் மூலம் தான் சொல்ல நினைத்ததை சிந்தாமல் சிதறாமல் சொல்லி, கைதேர்ந்த இயக்குநர்கள் வரிசையில் இடம் பிடிப்பதற்கான வாய்ப்பைப் பெற்றுள்ளார் ஐஸ்வர்யா ரஜினிகாந்த். படத்தின் கதை மற்றும் திரைக்கதைக்கு ஏற்ற இசையை கச்சிதமாக கொடுத்துள்ளார் இசைப்புயல் ஏ.ஆர்.ரஹ்மான்.
இரண்டாம் பாதி கொஞ்சம் இழுவையாக இருந்தாலும் குடும்பத்தோடு மட்டும் இல்லாமல் சமூகமே கொண்டாட வேண்டிய திரைப்படம். படத்தின் கதையை திரைக்கதையாக மாற்றும்போது அதில் பிரச்சார நெடி எதுவும் இல்லாமல், சிறப்பாக காட்சிப் படுத்தி, ரசிகர்களை திருப்திப்படுத்திய படக்குழுவுக்கு பாராட்டுக்கள்!
