குற்றப் பின்னணி உள்ளவர் போல்ட் கண்ணன்(விஜய் சேதுபதி). அவர் தன் பழைசை மறந்து புது வாழ்க்கையை ஆரம்பிக்க ஆசைப்பட்டு மலேசியா செல்கிறார். நான் எல்லாம் தொழில் அதிபர் என சொல்லிக் கொள்ளும் அறிவு (யோகி பாபு), போல்ட் கண்ணனை தன் நண்பனின் உறவுக்காரர் என்று தன் வீட்டிலேயே தங்க வைக்கிறார். அறிவு வீட்டிற்கு எதிர்வீட்டில் வசிக்கும் பெண் ருக்கு(ருக்மணி வசந்த்).
ருக்குவை போல்ட் கண்ணனுக்கு பிடித்துவிடுகிறது. ருக்குவும், போல்ட் கண்ணனும் காதலர்களாகிறார்கள். வளர்ப்பு தந்தை மூலம் தன் காதலி ருக்குவுக்கு சொத்து பிரச்சனை இருப்பதை தெரிந்து கொள்கிறார் போல்ட் கண்ணன். சொத்து பிரச்சனையை தீர்த்து வைத்தால் மட்டுமே காதலியுடன் நிம்மதியாக வாழ முடியும் என்கிற நிலை. அந்த சொத்து பிரச்சனையை தீர்த்து வைக்க நிறைய பணம் தேவைப்படுகிறது.
ரொம்ப யோசிக்காமல், இல்லை இல்லை யோசிக்கவே செய்யாமல் தியேட்டருக்கு சென்று திரையில் வருவதை அப்படியே பார்க்கும் படம் தான் ஏஸ். இதில் கிரைம் இருக்கிறது ஆனால் ஏஸ் கிரைம் படமா என கேட்டால் இல்லை. ஏஸில் பணக்கொள்ளை சம்பவம் இருக்கிறது. அப்படி என்றால் இது கொள்ளை படமான என்று கேட்டாலும் இல்லை. படத்தில் காதல் இருக்கிறது. அடடா காதல் இருக்கிறதே அப்படி என்றால் இது காதல் படம் தான் என நீங்கள் முடிவு செய்துவிடக் கூடாது. ஏனென்றால் இது காதல் படமும் இல்லை. அப்படி என்றால் இது எந்த மாதிரியான படம் தான் என கேட்கிறீர்களா?. எல்லாமும் கலந்த கலவையான படம் தான் ஏஸ்.
படத்தின் கதை எல்லா திசையிலும் செல்கிறது. ஹீரோயினுக்கு வீட்டில் பிரச்சனை, ஹீரோவுக்கு வாழ்க்கையில் பிரச்சனை, அவரின் தோழிக்கு பணப் பிரச்சனை, வங்கியில் கொள்ளை அடிப்பது அல்வா சாப்பிடுவது போன்று எளிது என்று காட்டியிருப்பது வேடிக்கையாக இருக்கிறது. வங்கியில் இவ்வளவு தான் பாதுகாப்பு இருக்கிறதா என கேள்வி கேட்க வைக்கிறது படம்.
எல்லாம் கண்டபடி கண்ட திசையில் சென்றாலும் எப்படியோ இயக்குநர் ஆறுமுக குமார் சமாளித்து அதை எல்லாம் ஒன்று சேர்த்திருக்கிறார். படம் எப்படி முடியும் என்பது நமக்கே தெரிந்துவிடுகிறது. போல்ட் கண்ணனின் வாழ்க்கை உள்பட சில எதிர்பார்க்காத டுவிஸ்ட்டுகள் படத்தில் இருக்கிறது. படத்தில் பல குறைகள் இருந்தாலும் பார்க்கலாம்.
விஜய் சேதுபதியின் நடிப்பு கவனத்தை பெறுகிறது. முதல் தமிழ் படத்திலேயே பாராட்டுகளை பெறுகிறார் ருக்மணி வசந்த். வளர்ப்பு தந்தை பப்லு ப்ரித்விராஜ் மற்றும் அவினாஷ் ஆகியோர் கொடூர வில்லன்கள் என சொல்ல முடியாது சுமார் ரகம் தான். திவ்யா பிள்ளைக்கு பெரிதாக வேலை இல்லை. யோகி பாபு ஃபுல் ஃபார்மில் இருந்து படத்திற்கு பெரிய பலமாக இருக்கிறார்.
