ஆர்யன் – விமர்சனம் ரேட்டிங் – 4 / 5

விஷ்ணு விஷால் ஸ்டுடியோஸ் தயாரிப்பில், சுப்ரா & ஆர்யன் ரமேஷ் வழங்க, இயக்குநர்  பிரவீன் K இயக்கத்தில்,  முன்னணி நட்சத்திர நடிகர் விஷ்ணு விஷால் மற்றும் இயக்குநர் செல்வராகவன் இணைந்து நடிக்க,  இன்வஸ்டிகேடிவ் திரில்லராக உருவாகியுள்ள திரைப்படம் “ஆர்யன்”.

விஷ்ணு விஷால் நடிப்பில் கடந்த 2018 ஆம் ஆண்டு வெளியான  ராட்சசன் திரைப்படம் பிரம்மாண்ட வெற்றிப்படமாக அமைந்தது . இதேபோல் கிரைம் த்ரில்லர் படமாக விறுவிறுப்பான இன்வஸ்டிகேட்டிவ் த்ரில்லராக உருவாகியுள்ளது ஆர்யன்.  இப்படத்தில் நடிகை ஷ்ரத்தா ஸ்ரீநாத், மானசா சௌத்திரி முக்கிய பாத்திரத்தில் நடிக்க, உடன் சாய் ரோனக், தாரக் பொன்னப்பா, மாலா பார்வதி, அவினாஷ், அபிஷேக் ஜோசப் ஜார்ஜ் ஆகியோர் இணைந்து  நடித்துள்ளனர்.

பொதுவாக சீரியல் கில்லர்களைப் பற்றிய படங்கள் அனைத்தும் ஒரே விதமாக இருந்தாலும் ஆர்யன் படம் மற்ற படங்களை விட சற்று மாறுபடுகிறது. “கொலை செய்யும் குற்றவாளி தனக்கு இந்த உலகத்தில் ஒரு நோக்கமிருப்பதாக நம்புகிறார். அதே நேரத்தில் அசாத்திய திறமைசாளியாகவும் இருக்கிறார். வில்லனின் ஒவ்வொரு நகர்வும் துல்லியமாக கணக்கிடப்பட்டு அரங்கேற்றப்படுகின்றன. ராட்சசன் படத்தைப் போல் இப்படத்திலும் தனது கரியரில் பெரிதாக சாதிக்க வேண்டும் என்கிற லட்சியத்தோடு ஓடுகிறார் நாயகன் விஷ்ணு விஷால். ராட்சசன் படத்தின் அருண் கதாபாத்திரத்தைப் போலவே இப்படத்தின் நாயகனும் புத்திசாலியானவன். ஆனால் தனக்கு இருக்கும் மன கஷ்டத்தால் நாயகன் மிக குறைவாகவே மகிழ்ச்சியை வெளிப்படுத்துபவராக இருக்கிறார். வில்லனாக நடித்துள்ள செல்வராகன் படத்தில் இன்னொரு நாயகன் என்றே சொல்லலாம் அவரது கதாபாத்திரத்தை ஏற்றுக்கொள்வதும் ஏற்றுக்கொள்ளாததும் பார்வையாளர்களின் விருப்பம் . நாயகி ஷ்ரத்த ஶ்ரீநாத் கதை நகரும் போக்கில் முக்கிய அங்கமாக இருக்கிறார்.

இது வழக்கமான சீட்டின் நுணியில் உட்கார வைக்கும் த்ரில்லர் படம் கிடையாது. இந்த படத்தில் உணர்ச்சிப்பூர்வமான காட்சிகளும் ஒரு சமூக கருத்தும் இருக்கிறது. அதானால் இப்படம் தனித்து நிற்கிறது. பார்வையாளர்களை பயமுறுத்தவோ சுவாரஸ்யத்தில் நகம் கடிக்கவோ இந்த படம் முயற்சிப்பதில்லை . அதனால் ராட்சசன் படம் போல் இருக்கும் என்கிற எதிர்பார்ப்புடன் செல்லாதீர்கள் , ஆனால் கிரைம் த்ரில்லர் படங்களை விரும்புபவர்களுக்கு நல்ல தீணி போடும் படமாக ஆர்யன் படம் இருக்கும் அறிமுக இயக்குநர் பிரவீன் இயக்கியுள்ள ஆர்யன் படம் வித்தியாசமான சமூக கருத்துள்ள ஒரு கிரைம் த்ரில்லர் ”  என்றே கூறலாம்.

காவல்துறை சீருடையில் மிடுக்கான தோற்றத்துடன் கம்பீரமாக வலம் வரும் விஷ்ணு விஷால், கொலை வழக்கை விசாரிக்கும் தோணியில் முதிர்ச்சியான நடிப்பை வெளிப்படுத்தி திரைக்கதைக்கு பெரும் பலம் சேர்த்திருக்கிறார். மானாசா உடனான காதல், திருமணம், விவாகரத்து என்று அவரது தனிப்பட்ட வாழ்க்கையின் பாதிப்புகளை ஒரு பாடலின் மூலம் வெளிக்காட்டினாலும், அதை தனது அழுத்தமான நடிப்பு மூலமாகவும், உடல் மொழி மூலமாகவும் அனாசியமாக ரசிகர்களிடத்தில் கடத்தி அசத்தியிருக்கிறார். கொலைகளை தடுப்பதற்கான முயற்சியில், அவர் சேகரிக்கும் தகவல்கள், அதனை வைத்து நடத்தும் விசாரணை என்று படத்தின் விறுவிறுப்புக்கு பாதிப்பில்லாத வகையில் இறுக்கமான நடிப்பை வெளிப்படுத்தி தனது கதாபாத்திரத்திற்கு நியாயம் சேர்த்திருக்கிறார்.

வில்லனாக நடித்திருக்கும் செல்வராகவன், சைக்கோ கொலையாளியாக பயமுறுத்தவில்லை என்றாலும், அடுத்து யாரை கொலை செய்யப் போகிறார் ? என்ற கேள்வியை படம் முழுவதும் ஏற்படுத்தி பார்வையாளர்களை பதற்றத்துடனே வைத்திருக்கிறார். அலட்டல் இல்லாத அவரது நடிப்பு, இயல்பான உடல் மொழி ஆகியவை, அவர் செய்யும் அனைத்து விசயங்களையும் நம்ப வைத்துவிடுகிறது.
தொலைக்காட்சி நிருபராக நடித்திருக்கும் ஷ்ரத்தா ஸ்ரீநாத், விஷ்ணு விஷாலின் மனைவியாக நடித்திருக்கும் மானசா செளத்ரி, கருணாகரன், அவினாஷ் என மற்ற வேடங்களில் நடித்திருப்பவர்கள் திரைக்கதை ஓட்டத்திற்கு பலம் சேர்க்கும் வகையில் நடித்திருக்கிறார்கள்.

வேகமான திரைக்கதை, விறுவிறுப்பான காட்சிகள் என்று படம் பயணித்தாலும், கதாபாத்திரங்களின் உணர்வுகளையும் பார்வையாளர்களிடம் தனது பின்னணி இசை மூலம் கடத்துகிறார் இசையமைப்பாளர் ஜிப்ரான்.

பயப்படுவதையும் தாண்டிய ஒரு உணர்வை பார்வையாளர்களிடம் ஏற்படுத்த வேண்டும், என்ற சவாலை மிக சாமர்த்தியமாக கையாண்டிருக்கும் ஒளிப்பதிவாளர் ஹரிஷ் கண்ணன், தன் கேமரா கோணங்கள் மற்றும் வண்ணங்கள் மூலம், பார்வையாளர்களை படத்துடன் ஒன்றிவிட செய்கிறார்.

படத்தொகுப்பாளர் ஷான் லோகேஷின் படத்தொகுப்பு மற்றும் சண்டைப் பயிற்சி இயக்குநர்கள் ஸ்டண்ட் ஷில்வா, பி.சி ஸ்டண்ட் பிரபு ஆகியோரது சண்டைக்காட்சிகளும் படத்திற்கு மிகப்பெரிய பலம் சேர்த்திருக்கிறது.

எழுதி இயக்கியிருக்கும் பிரவீன்.கே, இதுவரை சொல்லப்படாத ஒரு கோணத்தில் சைக்கோ திரில்லர் கதையை கையாண்டிருப்பதோடு, அதை நம்பும்படி லாஜிக்கோடு திரைக்கதை மற்றும் காட்சிகளை வடிவமைத்திருப்பது படத்திற்கும் பெரும் பலம் சேர்த்திருக்கிறது.

கொலையாளி யார்? என்பது தெரிந்து விட்டாலும், அவரைப் பற்றி சிந்திக்க விடாமல், அவர் செய்யப் போகும் கொலைகள் மற்றும் அதனை தடுக்க முயற்சிக்கும் ஹீரோவின் பயணத்தை படு சுவாரஸ்யமாக சொல்லியிருக்கும் இயக்குநர் அவ்வபோது செல்வராகவனின் செயல்களை புத்திசாலித்தனமாக சித்தரித்து காட்சிக்கு காட்சி வியக்க வைக்கிறார்.

பொதுவாக சைக்கோ திரில்லர் படம் என்றாலே, கொலைகளை இரத்தமும், சதையுமாக காட்சிப்படுத்தி பார்வையாளர்களை கதிலங்க வைக்க முயற்சிப்பார்கள். ஆனால், அத்தகைய எந்தவித முயற்சியும் மேற்கொள்ளாமல், ஒவ்வொரு கொலைகளையும் அறிவியல் பூர்வமாக நிகத்துவதோடு, காட்சிகளில் எந்தவித வன்மத்தையும் வெளிப்படுத்தாமல், அதன் பின்னணியில் மிகப்பெரிய சமூகப் பிரச்சனையை சொல்லியிருக்கும் இயக்குநர் பிரவீன்.கே, சிறுவர்கள் முதல் பெரியவர்கள் வரை, என அனைவரும் பார்க்க கூடிய ஒரு சைக்கோ திரில்லர் படமாகவும் கொடுத்திருக்கிறார்.

இதற்கு முன் விஷ்ணு விஷால் நடித்த பல படங்களில் சைக்கோ, திரில்லர், கொடைக்கான காரணங்களை தேடி அலையும் கதாநாயகன் கதாபாத்திரங்களில் நிறைய படங்கள் விஷ்ணு விஷால் நடித்திருந்தாலும் இந்த படம் அவருக்கு ஒரு மைல்கள் என்றே சொல்லலாம்.அந்த அளவுக்கு கதையோடு ஒன்றி தனது கதாபாத்திரத்தை கணக்கசிதமாக செய்து முடித்திருக்கிறார் அவருக்கு பாராட்டுக்கள்.

மொத்தத்தில் இந்த ஆர்யன் கிரைம் பிரியர்களுக்கு சிலிர்க்க வைக்கும் சிங்காரன்.