என்ன விலை – விமர்சனம்

வித்தியாசமான திரைக்கதை அமைப்பில் நல்ல படங்கள் வருவது மிகவும் கடினம், நேர்மையான முறையிலும் நல்ல திரைக்கதையுடனும் நீண்ட வருடங்களுக்கு பிறகு வந்திருக்கும் ஒரு அருமையான படம் என்ன விலை.

ராமேஸ்வரத்தின் பின்னணியில், நாம் அதிகம் அறிந்திராத ஒரு உலகத்தை கதைக்களமாக எடுத்துக்கொண்டு, ஒரு சாதாரண மனிதனின் வாழ்க்கையில் எதிர்பாராத விதமாக நிகழும் சம்பவம் எப்படிப்பட்ட மிகப்பெரிய பிரச்சினையாக மாறுகிறது என்பதையும், அந்த பிரச்சினை அவனது குடும்பத்தையும் சமூக வாழ்க்கையையும் எந்த அளவுக்கு பாதிக்கிறது என்பதையும் உணர்வுப்பூர்வமாக பதிவு செய்திருக்கிறார் இயக்குநர் சஜீவ் பழூர்.

ராமேஸ்வரத்தைச் சேர்ந்த எளிமையான மீனவராக வாழ்ந்து வருகிறார் தவசி கதாபாத்திரத்தில் நடித்திருக்கும் கருணாஸ். வாழ்க்கையை நடத்த பல்வேறு வேலைகளைச் செய்து வரும் அவர், கடலில் திதி கொடுப்பவர்கள் வீசும் சில்லறைக் காசுகளை நீருக்கடியில் சென்று சேகரித்தும் தனது வாழ்வாதாரத்தை நடத்துகிறார்.

அப்படிப்பட்ட ஒரு சூழலில் அவருக்குக் கிடைக்கும் பழமையான தங்க ஆபரணம், அவரது வாழ்க்கையையே புரட்டிப் போடுகிறது. நல்லெண்ணத்துடன் அந்த நகையை காவல்துறையிடம் ஒப்படைக்கும் ஒரு சாதாரண மனிதர், எதிர்பாராத விதமாக திருட்டுக் குற்றச்சாட்டுக்கு ஆளாகிறார்.

அதன்பிறகு நடைபெறும் சம்பவங்களும், காவல்துறை மற்றும் நீதிமன்றத்தைச் சுற்றி நகரும் கதைப்போக்கும் தான் ‘என்ன விலை’ திரைப்படத்தின் முக்கியமான பகுதியாக அமைகிறது.

ஒரு தனி மனிதன் தவறு செய்தால் சட்டம் அவனைத் தண்டிக்கிறது. ஆனால், ஒரு நிரபராதியின் வாழ்க்கையில் அமைப்பே தவறான முடிவை எடுத்துவிட்டால், அந்த மனிதனின் வாழ்க்கைக்கும் அவனது குடும்பத்திற்கும் ஏற்படும் பாதிப்புகளுக்கு யார் பொறுப்பு? என்ற முக்கியமான கேள்வியை படம் நம்முன் வைக்கிறது.

இந்தக் கருத்தை வெறும் வசனங்களாகச் சொல்லாமல், கதாபாத்திரங்களின் வாழ்க்கையின் வழியாக ரசிகர்களை உணர வைப்பதில் இயக்குநர் சஜீவ் பழூர் வெற்றி பெற்றிருக்கிறார்.

என்ன விலை’ திரைப்படத்தின் மிகப்பெரிய பலம் கருணாஸின் நடிப்பு.

இதுவரை நாம் பார்த்த கருணாஸை விட முற்றிலும் மாறுபட்ட ஒரு பரிமாணத்தை இந்தப் படம் அவரிடம் வெளிப்படுத்துகிறது. குடும்பத்தின் மீது பாசம் கொண்ட கணவனாகவும், பிள்ளைகளின் மீது அன்பு கொண்ட தந்தையாகவும், எந்தத் தவறும் செய்யாமல் குற்றவாளியாக்கப்பட்டபோது மனதளவில் உடைந்து போகும் மனிதராகவும் அவர் மிக இயல்பான நடிப்பை வழங்கியிருக்கிறார்.

குறிப்பாக, ‘நான் குற்றம் செய்யவில்லை’ என்று தனது நிரபராதித்தனத்தை நிரூபிக்க போராடும் காட்சிகளில் கருணாஸின் முகபாவனைகளே பல விஷயங்களைப் பேசுகின்றன.

நகைச்சுவை நடிகர் என்ற அடையாளத்தைத் தாண்டி, ஒரு கதையின் முழு பாரத்தையும் தன் தோளில் சுமந்து செல்லக்கூடிய நடிகர் என்பதை இந்தப் படம் மீண்டும் நிரூபிக்கிறது

படத்தின் இன்னொரு மிகப்பெரிய பலம் நிமிஷா சஜயன்.

வழக்கறிஞர் காஞ்சனா கதாபாத்திரத்தில் நடித்திருக்கும் அவர், அந்தக் கதாபாத்திரத்தை நடித்திருக்கிறார் என்று சொல்வதைவிட வாழ்ந்திருக்கிறார் என்றே சொல்லலாம்.

கருணாஸின் கதாபாத்திரத்தின் பின்னணியையும் அவரது நல்லெண்ணத்தையும் புரிந்துகொண்டு, அவருக்காக வழக்கை எடுத்துக்கொள்ளும் வழக்கறிஞராக நிமிஷா சஜயன் சிறப்பான நடிப்பை வெளிப்படுத்தியிருக்கிறார்.

குறிப்பாக நீதிமன்றக் காட்சிகளில் அவரது வசன உச்சரிப்பு, உடல்மொழி, வாதிடும் விதம் என அனைத்தும் கவனம் ஈர்க்கின்றன. படத்தின் கருத்தை ரசிகர்களிடம் வலுவாகக் கொண்டு சேர்ப்பதில் நிமிஷாவின் கதாபாத்திரம் முக்கியப் பங்கு வகிக்கிறது.

படத்தில் இடம்பெறும் ஒவ்வொரு கதாபாத்திரமும் கதைக்கு தேவையான அளவில் முக்கியத்துவம் பெற்றிருக்கிறது.

விஜயலட்சுமி வீரமணி, கமலேஷ் ஜெகன், ஒய்.ஜி. மகேந்திரன், பூர்ணிமா பாக்யராஜ், நிழல்கள் ரவி, மொட்டை ராஜேந்திரன், மோகன் ராமன், கவிதாலயா கிருஷ்ணன், தீபா சங்கர், லொள்ளு சபா சுவாமிநாதன், ஷாஷா சிவகுமார், சேத்தன் சீனு உள்ளிட்ட அனைவரும் தங்களுக்குக் கொடுக்கப்பட்ட கதாபாத்திரங்களுக்கு நியாயம் செய்திருக்கிறார்கள்.

சில முக்கியமான நடிகர்கள் குறுகிய நேரமே திரையில் தோன்றினாலும், அந்தக் காட்சிகளுக்கு தேவையான தாக்கத்தை ஏற்படுத்தியிருக்கிறார்கள்.

குறிப்பாக கருணாஸின் குடும்ப உறுப்பினர்களாக நடித்திருப்பவர்களின் நடிப்பு கதையின் உணர்வுப்பூர்வமான தருணங்களுக்கு கூடுதல் வலு சேர்க்கிறது.

படத்தின் உணர்வுகளை ரசிகர்களிடம் கொண்டு சேர்ப்பதில் சாம் சி.எஸ். இசை மிகப்பெரிய பங்களிப்பை செய்திருக்கிறது.

பின்னணி இசை பல காட்சிகளின் தாக்கத்தை அதிகப்படுத்துகிறது. குறிப்பாக கதையின் அழுத்தமான தருணங்களில் இசை காட்சிகளோடு இணைந்து பயணிப்பது படத்திற்கு கூடுதல் பலம்.

பாடல்களிலும், பின்னணி இசையிலும் தனது தனித்துவமான பாணியை வெளிப்படுத்தியிருக்கும் சாம் சி.எஸ்., ‘என்ன விலை’ திரைப்படத்தின் உணர்வுப்பூர்வமான பயணத்திற்கு முக்கியமான துணையாக அமைந்திருக்கிறார்.

ராமேஸ்வரத்தின் பின்னணியை வெறும் காட்சியழகுக்காக பயன்படுத்தாமல், கதையின் ஒரு முக்கிய அங்கமாகவே பதிவு செய்திருக்கிறார் ஒளிப்பதிவாளர் ஆல் பி. ஆண்டனி.

கடல், கடற்கரை, ராமேஸ்வரத்தின் வாழ்வியல் பின்னணி என காட்சிகள் அனைத்தும் கதையின் தன்மைக்கு ஏற்றவாறு இயல்பாகப் பதிவு செய்யப்பட்டிருக்கின்றன.

அதேபோல் ஸ்ரீஜித் சாரங் படத்தொகுப்பும் கதையின் வேகத்துக்கு ஏற்றவாறு அமைந்துள்ளது. தேவையற்ற நீளத்தைத் தவிர்த்து, முக்கியமான காட்சிகளை சரியான இடத்தில் இணைத்திருப்பது திரைக்கதையின் தாக்கத்தை அதிகரிக்கிறது.

இந்தப் படத்தின் மிகப்பெரிய பாராட்டு இயக்குநர் சஜீவ் பழூருக்குத்தான்.

மிகவும் எளிமையான ஒரு மனிதனை மையமாக வைத்து, சமூகத்தில் இருக்கும் சில முக்கியமான கேள்விகளை முன்வைத்து, அதனை வித்தியாசமான கதைக்களத்தில் சுவாரஸ்யமாகச் சொல்லியிருக்கிறார்.

ராமேஸ்வரத்தின் பின்னணியைத் தேர்வு செய்த விதம், கதாபாத்திரங்களை வடிவமைத்த விதம், நீதிமன்றப் பகுதிகளை அணுகிய விதம், கதையின் கருத்தை ரசிகர்களிடம் கொண்டு சென்ற விதம் என இயக்குநரின் உழைப்பு படம் முழுவதும் தெரிகிறது.

என்ன விலை’ வெறும் ஒரு திரைப்படம் அல்ல; ஒரு சாதாரண மனிதனின் வாழ்க்கையில் நேர்மைக்கும், உண்மைக்கும் கூட சில நேரங்களில் என்ன விலை கொடுக்க வேண்டியிருக்கிறது என்பதை கேள்வியாக முன்வைக்கும் படைப்பு.

தமிழ் ரசிகர்கள் எப்பொழுதுமே நல்ல கதைகளையும் நல்ல நடிப்புள்ள ரசிக்கத்தக்க வைக்க படங்களையும் எப்பொழுதும் கைவிடுவதில்லை இந்தப் படம் உள்பட வெற்றி நிச்சயம்.

12 வருடங்களுக்கு ஒரு முறை பூக்கும் மலர் குறிஞ்சி மலர்.

 அது போல தான் இந்த என்ன விலை படம்.

நேர்மையின் அடையாளம்