சப்தம் – விமர்சனம் ரேட்டிங் 3.5 / 5
இயக்குனர் அறிவழகன் இயக்கத்தில் ஆதி, லஷ்மி மேனன்,சிம்ரன், லைலா, ரெடின் கிங்ஸ்லி, எம் எஸ் பாஸ்கர், ராஜிவ் மேனன், விவேக் பிரசன்னா உள்ளிட்ட நட்சத்திரங்களின் நடிப்பில் உருவாகி இன்று வெளிவந்திருக்கும் திரைப்படம் தான் ”சப்தம்”.
இப்படத்திற்கு இசையமைத்திருக்கிறார் தமன். ஒளிப்பதிவு செய்திருக்கிறார் அருண் பத்மநாபன்.
தயாரித்திருக்கிறார் 7ஜி சிவா.
மூணார் பகுதியில் படத்தின் கதை நகர்கிறது. ஒரு பிரபல தனியார் மருத்துவக் கல்லூரியில் இருக்கும் நூலகத்தில் அடுத்தடுத்து சில மாணவர்கள் அங்கு தற்கொலை செய்து கொள்கின்றனர்.
இந்த தற்கொலை எதனால் நடைபெறுகிறது என்பதை விசாரிக்க பேய்களைப் பற்றி ஆராய்ச்சி செய்யும் நிபுணரான ஆதி அங்கு வருகிறார். இறந்து போன மாணவர்களின் உடலை பார்க்கும்போது கை, கால், முகம் அனைத்தும் கோணல்மாணலாகவும் உடலில் சைத்தானின் குறியீடு போன்ற ஒன்று இருப்பதையும் பார்க்கிறார் ஆதி.
இதனால் அந்த நூலகம் முழுவதும் அமானுஷ்யத்தால் சூழ்ந்து இருக்கிறது என்பதை கண்டறிகிறார் ஆதி. அந்த நூலகம் பல வருடங்களுக்கு முன்பு தேவாலயமாக இருந்ததையும் கண்டுபிடிக்கிறார்.தேவாலயத்திற்குள் இருக்கும் அமானுஷ்யங்கள் யார்.?? தேவாலயம் எப்படி அமானுஷ்யங்களின் கூடாரமாக மாறியது.?? மாணவர்கள் எதற்காக இறந்து போகிறார்கள்.??? என்ற கேள்விகளுக்கெல்லாம் விடை இரண்டாம் பாதியில் வைத்திருக்கிறார் இயக்குனர் அறிவழகன்.
நாயகனாக படத்தின் முதன்மை கதாபாத்திரத்தில் நடித்து அசத்தியிருக்கிறார் ஆதி.. பல வருடங்களுக்கு முன்பு வெளிவந்த ஈரம் படத்தில் எப்படியான நடிப்பை கொடுத்திருந்தாரோ, அதே நடிப்பை இப்படித்திலும் கொடுத்து தனது கேரக்டருக்கு பலம் சேர்த்திருக்கிறார் ஆதி. ஆனால், படம் முழுக்கவே ஒரே மாதிரியான முக பாவனைகளை வைத்திருப்பது சற்று சலிப்பைத் தட்டுகிறது.
காட்சிகளில் அழகாகவும் நடிப்பில் திறமையாவும் நடித்து அசத்தியிருக்கிறார் நடிகை லட்சுமி மேனன். அதிலும் யாக மாறும் காட்சியில் நடிப்பில் மிரள வைத்துவிட்டார் லட்சுமி மேனன்.
சிம்ரன் மற்றும் லைலா இருவருக்குமே குறைவான காட்சிகள் என்றாலும் நிறைவான ஒரு நடிப்பை கொடுத்து நம்மை வெகுவாக கவர்ந்திருக்கின்றனர். அதிலும் லைலாவின் நடிப்பு படத்திற்கு மிகப்பெரும் பலம் என்றே கூறலாம்.ஹாலிவுட் தரத்திற்கு ஒளிப்பதிவு கொடுத்து படத்தை பிரமாண்டமாகக் காட்டியிருப்பது படத்தின் ஒளிப்பதிவாளர் தான். ஒவ்வொரு காட்சிகளுக்கும் அப்படியான மெனக்கடலை கொடுத்து நம்மை திரும்பி பார்க்க வைத்திருக்கிறார்.
படத்தின் ஒட்டுமொத்த பெருமைகளுக்கும் சொந்தக்காரராக மாறிவிட்டார் இசையமைப்பாளர் தமன். இவரின் பின்னணிஇசை தான் படத்திற்கு பெரும் பலமாக வந்து நிற்கிறது.
பின்னணி இசையில் அதிலும் லைலாவுக்கு இசைக்கப்பட்ட பிஜிஎம் வேற லெவல் தான். மனம் பாதிக்கப்பட்ட குழந்தைகளுக்கு இசையும் ஒரு விதமான மருந்து தான் என்பதை இப்படத்தில் வெளிச்சமாக காட்டியிருக்கும் இயக்குனர் அறிவழகனுக்கு மிகப்பெரும் பாராட்டுகளை கொடுத்துவிடலாம்.திரைக்கதையினை இன்னும் சற்று தெளிவாக கொடுத்திருக்கலாமோ என்ற எண்ணம் எழுந்தது. படத்தொகுப்பு படத்தின் விறுவிறு காட்சியமைப்பிற்கு பெரிதாக கைகொடுத்திருக்கிறது.
மொத்தத்தில் இந்த சப்தம் ஒலிக்காக(சவுண்ட்) பார்க்கலாம்
