இயக்குனர் தனுஷ் என்ற பெயரில் அழகான, ரம்யமான, மெல்லிசையான காதல் கதையை இயக்கி இருக்கிறார்.
படம் துவங்கியதும் பெற்றோர் சரண்யா பொன்வண்ணன், நரேன் ஆகியோரின் வற்புறுத்தலால் பெண் பார்க்கச் செல்கிறார் பிரபு(பவிஷ்). அங்கு பார்த்தால் அந்த பெண் வேறு யாரும் அல்ல பிரபு உடன் சேர்ந்து பள்ளியில் படித்த ப்ரீத்தி(ப்ரியா பிரகாஷ் வாரியர்). திருமணம் குறித்து முடிவு எடுக்கும் முன்பு நாங்கள் பேசிப் பழகி ஒருவரையொருவர் புரிந்து கொள்ள நேரம் வேண்டும் என கேட்கிறார்கள் பிரபுவும், ப்ரீத்தியும்.
பிரபுவும், ப்ரீத்தியும் திருமணம் செய்து கொள்ள ஒரு முடிவு எடுக்கப் போகும் நேரத்தில் பிரபுவுக்கு அவரின் முன்னாள் காதலியான நிலாவிடம்(அனிகா சுரேந்திரன்) இருந்து திருமண அழைப்பு வருகிறது. இதையடுத்து நிலாவை காதலித்த கதையை ப்ரீத்தியிடம் சொல்கிறார் பிரபு.கதையை கேட்ட ப்ரீத்தியோ நீங்கள் நிஜமாகவே அந்த காதலை மறந்துவிட்டு அடுத்த கட்டத்திற்கு சென்றுவீட்டீர்களா என்பதை தெரிந்து கொள்ள நிலாவின் திருமணத்தில் கலந்து கொள்ளுங்கள் என ஐடியா கொடுக்கிறார். இதையடுத்து கோவாவில் நடக்கும் நிலாவின் திருமணத்திற்கு செல்கிறார் பிரபு.
ஜென் Z கிட்ஸின் காதலை அழகாக திரையில் காட்டியிருக்கிறார் தனுஷ். படம் ரொம்ப ஜாலியாக செல்கிறது. வழக்கமான படம் என்று சொல்லி நம் எதிர்பார்ப்பை குறைத்துவிட்டு சிறப்பான படத்தை கொடுத்திருக்கிறார் இயக்குநர்.
பவிஷை பார்த்தால் தனுஷ் தெரிகிறார். அக்கா மகன் என்பதால் மட்டும் அல்ல பார்க்கவும் தனுஷ் மாதிரி இருக்கிறார். மேலும் பவிஷ் நடிப்பில் தனுஷின் நடிப்பு தெரிகிறது. இயக்குநர் சொன்னபடியே நடித்திருக்கிறார் பவிஷ்.
ஆரம்பத்தில் டைட்டிலில் வழக்கமான காதல் கதை என்று போடும் தனுஷ் வித்தியாசமான காதல் கதையை கையாண்டிருக்கிறார்.இந்தப் படத்தை பார்க்கும் 40 வயதை கடந்தவர்கள் 1995 க்கு பிறகு பிறந்திருக்கலாம் என்ற ஏக்கம் வருவது நிச்சயம்.
