அனந்தா – விமர்சனம்
ஸ்ரீ சத்ய சாய்பாபாவின் பக்தர்களின் வாழ்க்கை அனுபவங்களை மையமாக கொண்டு உருவாகியுள்ள திரைப்படம் ‘அனந்தா’. புட்டபார்த்தியில் உள்ள சாய்பாபா மருத்துவமனையில் கதை தொடங்குகிறது. சாய்பாபா ஒருமுறை கடைசியாக ஆசிரமத்திற்கு வருமாறு கூறியதாக மருத்துவமனை நிர்வாகி தெரிவிக்க, பல்வேறு தரப்பைச் சேர்ந்தவர்கள் அங்கு கூடுகிறார்கள். சுஹாசினி, ஜகபதி பாபு, வை.ஜி. மகேந்திரன், தலைவாசல் விஜய் ஆகியோர் தங்களது வாழ்க்கையில் சாய்பாபா ஏற்படுத்திய மாற்றங்களை அனுபவக் கதைகளாக பகிர்ந்து கொள்கிறார்கள்.
புகழ்பெற்ற இயக்குநர் சுரேஷ் கிருஷ்ணா எழுதி இயக்கியுள்ள இந்த படம், மனிதர்கள் வாழ்க்கையில் சந்திக்கும் சிக்கல்கள் மற்றும் அவற்றை சாய்பாபாவின் தெய்வீக அருள் எவ்வாறு மாற்றுகிறது என்பதைக் குறும்படத் தொடர் வடிவில் சொல்லுகிறது. ஒவ்வொரு அத்தியாயமும் உணர்ச்சியையும் பக்தியையும் முன்னிறுத்தி அமைக்கப்பட்டுள்ளது.
படம் ஆரம்பத்தில் சற்றே மெதுவாகவும் கணிக்கக்கூடிய வகையிலும் நகர்ந்தாலும், கதைகள் ஒன்றன்பின் ஒன்றாக விரியும் போது ஆர்வம் அதிகரிக்கிறது. சாய்பாபாவின் வாழ்க்கை வரலாற்றை விட, அவரது பக்தர்கள் அனுபவிக்கும் தெய்வீக நம்பிக்கையே முக்கியமாக முன்வைக்கப்படுகிறது. இதனால் படம் ஒரு கதைப் படத்தை விட ஆவணப்படத் தன்மையை அதிகம் கொண்டதாகத் தோன்றுகிறது. அனைத்து அத்தியாயங்களிலும் வை.ஜி. மகேந்திரன் நடித்த பகுதி மிகச் சிறப்பாக அமைந்துள்ளது. மனைவியை இழந்த முதியவரின் தனிமையும் மன வேதனையும் அவர் வெளிப்படுத்தும் விதம் மனதை நெகிழச் செய்கிறது. அந்தக் கதையில் வரும் திருப்பமும் உணர்ச்சிப் பரவசமும் படத்தின் வலிமையான தருணமாக அமைகிறது.
இதற்கு மாறாக, ஜகபதி பாபு நடித்த அத்தியாயம் சற்று செயற்கையாக தோன்றுகிறது. வங்கி கொள்ளை சம்பவங்கள் மற்றும் அவரது கதாபாத்திரத்தின் உணர்ச்சி வெளிப்பாடுகள் ஆழம் குறைவாக, கட்டாயப்படுத்தப்பட்டதாக தெரிகிறது. சில இடங்களில் படம் தேவையற்ற போதனைத் தன்மைக்கு சென்று, இயல்பை இழக்கிறது.
சுஹாசினி நடித்த பகுதி உணர்ச்சிகரமாக இருந்தாலும், சற்று நீளமாக அமைந்துள்ளது. மருத்துவரின் மூலம் சாய்பாபாவின் தெய்வீக இருப்பை உணர்த்தும் காட்சிகள் நன்றாக கையாளப்பட்டுள்ளன.
நடிப்பில் வை.ஜி. மகேந்திரன் முன்னிலை வகிக்கிறார். சுஹாசினியின் நடிப்பும் திருப்திகரமாக உள்ளது. மற்ற நடிகர்கள் தங்களது பங்கை சராசரி அளவில் நிறைவேற்றியுள்ளனர். தயாரிப்பு தரம் நன்றாகவும், தேவாவின் பின்னணி இசை கதையின் உணர்ச்சியை மேலும் வலுப்படுத்தும் வகையிலும் அமைந்துள்ளது.
மொத்தத்தில், ‘அனந்தா’ சாய்பாபாவின் மகத்துவத்தையும் அவரது பக்தர்களின் நம்பிக்கையையும் பேசும் ஒரு பக்தி நாடகத் திரைப்படம். சில அத்தியாயங்கள் உணர்ச்சிகரமாக மனதை தொடினாலும், சில பகுதிகளில் போதனைத் தன்மை அதிகமாக உள்ளது.
சத்ய சாய்பாபா பக்தர்களுக்கும், பக்தி கதைகளில் ஆர்வம் உள்ளவர்களுக்கும் இந்த படம் ஒரு ஆன்மீக அனுபவமாக இருக்கும்.
இந்த தைத்திருநாளில் சாய்பாபாவின் புகழ் பரவட்டும் உலகெங்கும்
