கொலைச்சேவல் – விமர்சனம்
கலையரசன், தீபா பாலு, பாலா சரவணன், கஜராஜ் உள்ளிட்ட பலர் நடித்துள்ள திரைப்படம் ‘கொலைச்சேவல்’. இயக்குனர் துதிவாணன் இயக்கியுள்ள இந்த படத்தை ஆர்.பி. பிலிம்ஸ் சார்பில் ஆர்.பி. பாலா தயாரித்துள்ளார். இசையமைப்பாளர் சந்தன் இசையமைத்துள்ளார்.
ஒருவரை ஒருவர் நேரில் பார்க்காமல் மொபைல் மூலம் பேசி காதலிக்கும் இளைஞன்-இளம்பெண் கதையிலிருந்து படம் தொடங்குகிறது. வெவ்வேறு ஜாதி மற்றும் வெவ்வேறு ஊர்களைச் சேர்ந்த கலையரசன் மற்றும் தீபா பாலு காதலித்து, பெற்றோரின் எதிர்ப்பை மீறி திருமணம் செய்கிறார்கள்.திருமணத்திற்கு பிறகு தீபா பாலு கர்ப்பமாகிறார். பிறக்கவிருக்கும் குழந்தை நலமாக இருக்க வேண்டும் என்ற நம்பிக்கையில் இருவரும் குலதெய்வ கோயிலுக்கு சென்று பூஜை செய்ய முடிவு செய்கிறார்கள். அந்த கோயில் பயணத்தின் போது நிகழும் கொடூரமான சம்பவமே படத்தின் மையக்கரு.
கலையரசன் எப்போதும் போல இயல்பான நடிப்பை வெளிப்படுத்துகிறார். பல்வேறு வித்தியாசமான கதாபாத்திரங்களை தேர்ந்தெடுக்கும் திறமை கொண்ட நடிகராக அவர் அறியப்படுகிறார். ஆனால் இந்த படத்தின் கதைக்களம் மற்றும் திரைக்கதை அவரது திறமையை முழுமையாக பயன்படுத்தவில்லை என்றே தோன்றுகிறது.
நாயகியாக அறிமுகமாகும் தீபா பாலு, கிராமத்து பெண் கதாபாத்திரத்தில் அழகாகவும் நம்பிக்கையுடனும் நடித்துள்ளார். முதல் படமாக இருந்தாலும் நடிப்பில் குறை காணப்படவில்லை. ஆனால் இப்படியான இருண்ட கதைக்களத்தை அறிமுகப் படமாக தேர்ந்தெடுத்தது அவருக்கான சரியான முடிவா என்ற கேள்வி எழுகிறது.
பாலா சரவணன், கலையரசனின் நண்பராக வந்து சில இடங்களில் நகைச்சுவை மூலம் சிரிப்பை ஏற்படுத்துகிறார். குறிப்பாக கிளைமாக்ஸ் பகுதியில் அவர் காட்டும் குணச்சித்திர நடிப்பு கவனம் பெறுகிறது.
தீபா பாலுவின் தந்தையாக வரும் கஜராஜ் படத்தில் அதிக வசனங்கள் பேசாமல் இருந்தாலும், முகபாவனைகளின் மூலம் தனது கதாபாத்திரத்தை வெளிப்படுத்த முயற்சித்துள்ளார்.
இசையமைப்பாளர் சந்தனின் பின்னணி இசை படத்திற்கு ஒரு அளவுக்கு பலம் சேர்க்கிறது. சில காட்சிகளில் இசையின் மூலம் பதட்டத்தை உருவாக்க முயற்சி செய்துள்ளார். ஆனால் சில நேரங்களில் அந்த இசை படம் எந்த வகை என்பதை கூட குழப்பமாக மாற்றுகிறது — இது திரில்லரா, பேய் படமா என்ற சந்தேகத்தை கூட எழுப்புகிறது.
ஆணவக் கொலை போன்ற முக்கியமான மற்றும் சமூக ரீதியாக தாக்கம் கொண்ட விஷயத்தை மையமாக வைத்து இயக்குனர் துதிவாணன் படம் எடுத்திருக்கிறார். ஆனால் அதை சொல்லும் விதம் பல இடங்களில் குழப்பமாக உள்ளது.
முதல் பாதியில் கதை எந்த திசையில் செல்கிறது என்பதே தெளிவாக தெரியாமல் நீள்கிறது. கோயிலுக்கு செல்லும் பயணம் நீளமாகவும் சீரற்றதாகவும் தோன்றுகிறது. கதையின் மையம் எதுவென்பது பார்வையாளர்களுக்கு தெளிவாக புரியாமல் போகிறது.
இரண்டாம் பாதியில் தான் கதை உண்மையான நோக்கத்தை அடைகிறது. ஆனால் ஆணவக் கொலை சம்பவத்தை மிகக் கொடூரமாகவும் மனஅழுத்தத்தை ஏற்படுத்தும் விதமாகவும் காட்சிப்படுத்தியிருப்பது பார்வையாளர்களுக்கு சிரமத்தை ஏற்படுத்துகிறது. ஒரு பொழுதுபோக்குக்காக திரையரங்கிற்கு வரும் மக்களுக்கு இந்த வகை காட்சிகள் கடும் எரிச்சலை உருவாக்கும் வகையில் இருக்கின்றன.
சமூக பிரச்சினையை எடுத்துக் கொண்டாலும், அதை திரைக்கதையாக சொல்லும் முறையில் பல குறைகள் தென்படுகின்றன. வலுவான நடிகர்கள் இருந்தும், சீரான கதை சொல்லல் இல்லாததால் படம் எதிர்பார்த்த தாக்கத்தை ஏற்படுத்த முடியவில்லை.
மொத்தத்தில், ‘கொலைச்சேவல்’
நேரம் குறைவு, தூரம் அதிகம், சுமார் ரகம்
