லெலின் பாண்டியன் – விமர்சனம்

நடிகர் சிவாஜி கணேசனின் பேரன் தர்ஷன் கணேசன் கதாநாயகனாக அறிமுகமாகும் புதிய தமிழ் திரைப்படமாகும். இப்படத்தை அறிமுக இயக்குநர் D.D. பாலச்சந்திரன் இயக்க, சத்யஜோதி பிலிம்ஸ் நிறுவனம் தயாரித்துள்ளது.

மானாமதுரை மற்றும் கிராமப்புறப் பகுதிகளில் நடக்கும் ஆபத்தான மணல் கடத்தல் மற்றும் கனிம கொள்ளையை மையமாகக் கொண்டு இக்கதை உருவாக்கப்பட்டுள்ளது.

தண்டனை மாற்றலில் செல்லும் ஒரு நேர்மையான காவல்துறை அதிகாரியும், பாதிக்கப்படும் கிராம மக்களும் இணைந்து ஒரு ஊழல் அமைப்பை எவ்வாறு எதிர்க்கிறார்கள் என்பதே இப்படத்தின் முக்கியக் கதையாகும்.

பன்முகத் திறமையாளர் கங்கை அமரன், நீண்ட இடைவெளிக்குப் பிறகு தமிழில் ரீஎன்ட்ரி தரும் ரோஜா மற்றும் ஆடுகளம் நரேன், போஸ் வெங்கட் போன்ற பலர் நடித்துள்ளனர்.தர்ஷன் கணேசன் நாயகனாக அறிமுகமாகிறார்; அவருக்கு ஜோடியாக ஸ்ரித்தா ராவ் நடித்துள்ளார்.

இசைஞானி இளையராஜா இப்படத்திற்கு இசையமைத்துள்ளார்.

கிராமத்தில் கங்கை அமரன் – ரோஜா தம்பதியினர் செல்லமாக வளர்க்கும் ஆடு, மணல் கொள்ளைக் கும்பலின் லாரியில் சிக்கி உயிரிழக்கிறது. இதற்கு நியாயம் கேட்டு கங்கை அமரன் போராடத் தொடங்குகிறார். மணல் கொள்ளைக்கு எதிரான அவரது புகாரால் பிரச்சினை பெரிதாகி, அவருக்கு ஆபத்து ஏற்படுகிறது. இதையடுத்து அவருக்கு பாதுகாப்பு வழங்கும் பொறுப்பு, உயர் அதிகாரிகளால் பெரிதாக மதிக்கப்படாத காவலரான தர்ஷன் கணேசனிடம் வருகிறது. ஆரம்பத்தில் சாதாரண பணியாக நினைக்கும் அவர், பின்னர் வழக்கின் பின்னணியில் இருக்கும் ஆபத்தையும் தனது பொறுப்பையும் உணர்கிறார்.

தர்ஷன் கணேசன் முதல் படத்திலேயே அழுத்தமான நடிப்பை கொடுத்துள்ளார். சாதாரணமாக இருக்கும் காவலர் படிப்படியாக பொறுப்பை உணரும் மாற்றத்தை அவர் இயல்பாக வெளிப்படுத்துகிறார். கங்கை அமரனும் ரோஜாவும் அனுபவமான நடிப்பால் கிராமத்து தம்பதியினரின் வாழ்க்கையை நம்பகமாக காட்டுகின்றனர். மற்ற நடிகர்களும் கதைக்கு தேவையான அளவில் தங்களது பங்களிப்பை வழங்கியுள்ளனர்.

படத்தின் முக்கிய பலமாக அதன் சமூகப் பின்னணி அமைகிறது. மணல் கொள்ளை, அதற்கு துணை போகும் அதிகார அமைப்பு, சாதாரண மக்கள் எதிர்கொள்ளும் அழுத்தம் ஆகியவற்றை இயக்குநர் கதைக்குள் கொண்டு வந்துள்ளார். நீதிமன்ற காட்சிகளிலும் சில வசனங்கள் கவனம் பெறுகின்றன. அதே நேரத்தில், கதையில் சில இடங்களில் ஏற்கனவே பார்த்த படங்களின் சாயல் தெரிகிறது. சில காட்சிகளில் திரைக்கதையின் வேகமும் குறைகிறது.

ஒளிப்பதிவு கிராமத்து சூழலை இயல்பாக பதிவு செய்துள்ளது. இளையராஜாவின் இசை படத்தின் உணர்வுக்கு கூடுதல் பலம் சேர்க்கிறது. குறிப்பாக ‘முதல் மரியாதை’ படத்தின் பாடல்கள் ஆங்காங்கே பயன்படுத்தப்பட்டிருப்பதும், ‘பூங்காற்று திரும்புமா’ பாடலின் பின்னணி இசையும் பழைய இளையராஜா இசையை நினைவுபடுத்துகின்றன.

மொத்தத்தில், மணல் கொள்ளைக்கு எதிரான போராட்டத்தை ஒரு காவலரின் பொறுப்பு மற்றும் ஒரு குடும்பத்தின் வாழ்க்கையுடன் இணைத்து சொல்லியிருக்கும் சமூக அக்கறை கொண்ட படமாக ‘லெனின் பாண்டியன்’ உருவாகியுள்ளது. கதை சொல்லும் விதத்தில் சில குறைகள் இருந்தாலும், நடிப்பு, இசை, கிராமத்து பின்னணி ஆகியவை படத்திற்கு பலம் சேர்க்கின்றன.

நகரத்து படம் பார்த்து போர் அடித்தவர்களுக்கு இந்த கிராமத்து வாழ்க்கையுள்ள இந்த லெனின் பாண்டியன் நல்ல பொழுதுபோக்கு அம்சம்.