‘கா’ – விமர்சனம்

வழக்கமாக திரைக்கதை எழுதும் போது ஒன் லைன் ஒன்றை ரெடி பண்ணி விடுவார்கள். ஆனால், இதில் படத்தின் முதல் பாதியே ஒன் லைனில்தான் இருக்கிறது.

வைல்ட் லைஃப் புகைப்படக் கலைஞராக இருக்கும்.ஆண்ட்ரியா ஒரு வனப்பகுதியில் புகைப்படமெடுக்க செல்ல, வனக் காவலர் அர்ஜுன் சிங் உடன் செல்கிறார். அவ்வளவுதான் முதல்பாதி.

படத்தின் ஆரம்பத்தில் தன்னைக் காதலிக்க மறுத்த பெண்ணை ஆசிட் அடித்துக் கொன்றுவிட்டு ஓடுகிறார் ஒரு வாலிபன். கூடவே ஒரு வனத்தில் வில்லன் சலீம் கௌஸின் ஆட்கள், ஒரு இளம்பெண்ணைக் கொல்கிறார்கள்.

இதற்கும், ஆன்ட்ரியாவுக்கும் என்ன சம்பந்தம் என்பதைக் கடைசிவரை பொறுமையுடன் பார்த்தால் புரிந்து கொள்ளலாம்.

அதென்னவோ, செல்வராகவன் ஆனாலும் சரி, இந்தப்பட இயக்குனர் நாஞ்சில் ஆனாலும் சரி, ஒரு ஜீன்ஸ், டி ஷர்ட் கொடுத்து அலைய விட்டு விடுகிறார்கள்.

அது ஒன்றுதான் நம் பொறுமைக்கும் ஆறுதலாக அமைந்தது விடுகிறது. ஆண்ட்ரியாவின் பின்புறம், முன்புறம் காட்சிப்படுத்திய அளவில் கூட ஆண்ட்ரியாவின் பின்னணியோ, முன்னணியோ சொல்லப்படவில்லை. சர்வ சாதாரணமாக காட்டில் புழங்கி இரண்டு மூன்று பேரைப் போட்டுத் தள்ளுகிறார்.

ஆமையாக நகரும் திரைக்கதையில் ஆண்ட்ரியாவையாவது திரையில் பார்த்துக் கொண்டிருக்கலாம். ஆனால் நத்தை வேகத்தில் அர்ஜுன் சிங் நடப்பது, பார்ப்பது, சிறுநீர் கழிப்பதை எல்லாம் பல நிமிடங்கள் பார்த்துக் கொண்டிருக்க நேர்வது கொடுமை.

ஆனால், அச்சு பிச்சான அர்ஜுன் சிங் தன் கேரக்டரை அருமையாக செய்திருக்கிறார். ஆனால், அவரையெல்லாம் ஒரு வனக் காவலராக எப்படித் தேர்ந்தெடுத்தார்கள் என்பது புரியவில்லை.

சலீம் கௌஸின் மெஜஸ்டிக்கான நடிப்புக்கு படத்தில் அதிக வேலையில்லை. அவர் ஏதோ புரட்சிப்படை தளபதி போன்ற வேடத்தில் இலச்சினை கொண்ட உடை எல்லாம் அணிந்து வருகிறார். அவர் உடன் வருபவர்களும் அப்படியே.

அவர் அவ்வப்போது சொல்லும் கவிதைகளுக்கு எல்லாம் லாஜிக் பிடித்த இயக்குனர் அவர் செய்யும் கொலைகளுக்கு எந்த.லாஜிக்கும் வைக்கவில்லை. கண்ணில் படும் எல்லோரையும் கொல்கிறார்.

எல்லோருக்கும் மரண தண்டனை தரும், அவர் தனக்குத் தானே தண்டனையும் கொடுத்துக் கொள்வது சைக்கோ போன்ற அவர் வேடத்துக்கு பொருத்தம்தான்.

சுந்தர் சி.பாபுவின் இசைதான் இந்த மெத்தனக் கதையைக் கடத்த உதவி இருக்கிறது. அறிவழகன் ஒளிப்பதிவில் கானகம் ,  கழுவி விட்டார்போன்ற அழகுடன் காட்சி அளிக்கிறது.

 மொத்தத்தில் இந்த ‘கா’ படத்தில் ஆண்ட்ரியா மட்டுமே அழகு,  அவருக்கு கா விட மறுக்கின்றது மனது.