காதலிக்க நேரமில்லை – விமர்சனம்
கிருத்திகா உதயநிதி இயக்கத்தில் ரவி மோகன், நித்யா மேனன், யோகி பாபு, மற்றும் பலர் நடித்திருக்கும் படம் காதலிக்க நேரமில்லை.
பெங்களூரில் வேலை செய்கிறார் சித்தார்த்(ரவி மோகன்). அவருக்கு நிச்சயதார்த்தம் நின்றுவிடுகிறது. காதலி செய்த துரோகத்தை நினைத்து வேதனையில் இருக்கிறார். இதையடுத்து திருமணம், குழந்தைகள் மீது ஈர்ப்பு இல்லாமல் போய்விடுகிறார்.
ஸ்ரேயாவோ(நித்யா மேனன்) தனக்கு துரோகம் செய்த கணவரை பிரிகிறார். அதன் பிறகு விந்தனு தானம் பெற்று தாயாக முடிவு செய்கிறார். அவர் செயற்கை முறையில் தாயாக முடிவு செய்து மருத்துவமனைக்கு செல்வதை மிகவும் லேசாக காட்டியிருக்கிறார் கிருத்திகா உதயநிதி. விந்தனு தானம் பெற்று கர்ப்பமாகிறார். இந்நிலையில் வேலை விஷயமாக பெங்களூர் செல்லும் இடத்தில் சித்தார்த்தை சந்திக்கும் ஸ்ரேயாவுக்கு அவர் மீது ஃபீலிங்ஸ் வருகிறது. அதன் பிறகு என்ன நடக்கிறது என்பதே கதை.
சரியான ஆட்களை தேர்வு செய்து காதலிக்க நேரமில்லை படத்தை ரசிக்கும்படி கொடுத்திருக்கிறார் கிருத்திகா. காதல் காட்சிகளில் ரவி மோகன் அசத்துகிறார். வினய் கொடூர வில்லனாக இல்லாமல் நல்ல நண்பனாக வந்திருப்பது ரசிக்க வைக்கிறது. நித்யா மேனன் வழக்கம் போன்று அந்த கதாபாத்திரமாகவே மாறியிருக்கிறார். ஸ்ரேயா என்பது வெறும் கதாபாத்திரம் என தெரிந்தும் கூட அவருக்காக நம்மை கவலைப்பட வைக்கிறார்.
ஏ ஆர் ரகுமான் கதைக்கு என்ன தேவையோ அதை கச்சிதமாக செய்திருக்கிறார் அவருக்கும் ஒரு பாராட்டுக்கள். குறிப்பாக படத்தின் இறுதியில் ஆங்கில பாடல் அருமை.
குறிப்பிட்ட ஒரு விஷயம் இந்த படத்தில் சொல்ல வேண்டுமென்றால் எந்த ஒரு விஷயத்தையும் படு விரசமாக காட்டாமல் நாகரீகமுறையில் காட்டி இருப்பது இயக்குனரின் தனித்திறமை.
அடுத்து என்ன நடக்கப் போகிறது என்பதை கணிக்க முடிந்தாலும் படம் முடியும் போது யாரும் எதிர்பார்க்காதது நடக்கிறது. திரைக்கதையில் மைனஸ் இருந்தாலும் அதை மறக்க வைத்திருக்கிறார் கிருத்திகா உதயநிதி.
