அனோமி – விமர்சனம்

கிரைம் இன்வெஸ்டிகேஷன் கதைக்களம் என்றாலே சட்டென ஞாபகம் வருவது மலையாள திரைப்படங்கள்தான் அந்த அளவுக்கு திரைக்கதையும் கதையும் நேர்த்தியான முறையில் கையாள்வார்கள்.

அப்படி ரகுமான் பாவனா நடித்து கடந்த மாதம் மலையாளத்திலும் இந்த மாதம் தமிழிலும் வெளிவரும் அனோமி படத்தின் விமர்சனத்தை தான் பார்க்க போறோம்.

தாய் தகப்பன் இல்லாத  சற்று மனநிலை பாதிக்கப்பட்ட தன் தம்பியை தன் உயிருக்கு மேலாக பார்த்து வரும் பாவனா திடீரென தன் தம்பியை காணவில்லை என்கிற போது அவர் பரபதப்பதும் அதற்காக காவல்துறையினரிடம் உதவி கேட்பதும் பரபரக்க வைக்கும் காட்சிகள்.

போலீஸ் ஆபீஸராக ரகுமான் என்ட்ரி ஆனதும் சூடு பிடிக்கிறது திரைக்கதை.

ஒவ்வொரு கட்டமாக அவர் விசாரணையில் முன்னேற நமக்குதான் மூச்சு முட்டுகிறது அப்படி ஒரு அற்புதமான நடிப்பு அவரிடம் இருந்து…

பாவனாவின் தம்பியாக நடித்திருக்கும் செபின் பென்சனும் அசத்தியிருக்கிறார். அதேபோன்று கொலையாகும் மற்ற இளைஞர் இளைஞிகளும் மிகப் பொருத்தமாக இருக்கிறார்கள்.

பாவனாவின் காதலராக வரும் அர்ஜுன் லாலின் நடிப்பும் நன்று.

இந்த புலனாய்வு கதைக்குள் சேசிங், மழைச் சண்டை போன்ற பரபரப்பான காட்சிகளும் இடம் பெற்று இருப்பது படத்தில் நீளம் குறித்து நாம் கவலைப்படாமல் இருக்க உதவுகிறது.

ஒளிப்பதிவு படத்தை தூக்கி நிறுத்துகிறது என்றால் பின்னணி இசையும் பாடல்களும் அவற்றைத் தாங்கி நிறுத்துகின்றன. கொலையாளி ஒரு சைக்கோ கில்லராக இல்லாமல் கொலைகளுக்காக சொல்லும் காரணம் ரொம்பவே புதியது. அரசியலுக்காக, சாதி வெறிக்காக நடக்கும் கொலைகளை விட நாங்கள் செய்தது பெரிய குற்றமில்லை என்று கொலையாளி வாதிடும் இடம் நிறைய யோசிக்க வைக்கிறது.

Equation of Death என்கிற கதையின் மையப் புள்ளி எதிர்கால அறிவியலில் முக்கியத்துவம் பெறலாம்.

கிரைம், திரில்லர் பிரியர்களுக்கு சூறாவளி படம்.